غزل ترکی) یاشیل بایراغین آلتیندا
واردیر اورگیمده هوس یار هنوزدا
چوخدور اومیدیم تا گله دلدار هنوزدا
گل،قوی قدمین گؤزلریم اوسته،بو دنیزلر
تقدیم ائده مین لؤلؤ شهوار هنوزدا
قدّیم پوکولوب،چهره سارالمیش یئنی آی تک
افسوس ائدیری عشقیمی انکار هنوزدا
سینمیشسا بئلیم باغلادیغیم عهدیمی پوزمام
حشره کیمی محکم دی بو ایلقار هنوزدا
وصفین ائشیدندن نماز اوستونده زلیخا
تاپمیر عزیزی رخصت دیدار هنوزدا
رخسار ملک منظرین ای ماه دلآرا !
حیران قویاجاخ چوخلی دل افکار هنوزدا
آی پارچاسی! آی پارچالانار اشتیاقیندان
بیتمز یئری،آلنیندا اثر وار هنوزدا
اون دؤرت گئجه لیک آی دی پاریلدیر وجناتین
یوزلر بولوت آلتیندا پدیدار هنوزدا
عالم لری تسخیر ائده جک خلق عظیمین
بیر حلقۀ میم ایچره گرفتار هنوزدا
کروان گئچه جک گئچمغینه،قوی هوره ایت لر*
سنسن بیزه جون قافله سالار هنوزدا
چوخدور او یاشیل بایراغین آلتینداکی جان لار
قربان آدینا احمد مختار(ص) هنوزدا
ـــــــــــــــــــــــــــــــــــــــــــــــــــــــــــــــــــــــــ
*بر گرفته از ضرب المثلی آذری که می گوید: "ایت هورر،کروان گئچر" ؛تقریباً برابر "مه فشاند نور و سگ عوعو کند" در فارسی.